ശ്രീ അന്നപൂർണ്ണേശ്വരി ദേവി

ഓം അന്നപൂർണ്ണേ സദാപൂർണ്ണേ ശങ്കരപ്രാണവല്ലഭേ, ജ്ഞാനവൈരാഗ്യസിദ്ധ്യർത്ഥം ഭിക്ഷാം ദേഹി ച പാർവ്വതി.

ശ്രീ പാർവതിയുടെ ഒരു മൂർത്തിഭേദം. സർവ സമൃദ്ധിയുടെയും ഭഗവതി. ആദിപരാശക്തിയുടെ ആഹാരം നൽകുന്ന മാതൃഭാവം.കാശിയിൽ നിന്നും സ്വർണ്ണക്കപ്പലിൽ മലബാറിന്റെ പുണ്യഭൂമിയിലേക്ക് എഴുന്നള്ളിയ പ്രപഞ്ചമാതാവ്. ഒരു കയ്യിൽ അമൃതപാത്രവും മറുകയ്യിൽ തവിയുമേന്തി, ഭക്തരുടെ ആത്മീയവും ഭൗതികവുമായ വിശപ്പകറ്റുന്ന കരുണാമയിയായ അമ്മയാണ് ചെറുകുന്നിലമ്മ. അമ്മയുടെ തിരുനടയിൽ പ്രാർത്ഥിക്കുന്നവർക്ക് ജീവിതത്തിൽ ഒരിക്കലും അന്നത്തിന് മുട്ടുണ്ടാകില്ലെന്നാണ് വിശ്വാസം.

ശ്രീകൃഷ്ണ ഭഗവാൻ

ക്യഷ്ണായ വാസുദേവായ ഹരയേ പരമാത്മനേ, പ്രണതക്ലേശനാശായ ഗോവിന്ദായ നമോ നമഃ

പരശുരാമനാൽ പ്രതിഷ്ഠിതമായ ഈ പുണ്യസങ്കേതത്തിലെ ആദിമൂർത്തിയാണ് ശ്രീകൃഷ്ണ ഭഗവാൻ. വാസ്തുശാസ്ത്രപരമായി അന്നപൂർണ്ണേശ്വരി ദേവിയോട് ഒപ്പത്തിനൊപ്പം തുല്യപ്രാധാന്യത്തോടെ ഭഗവാനും ഇവിടെ കുടികൊള്ളുന്നു.ഐതിഹ്യങ്ങൾ പ്രകാരം ഈ ക്ഷേത്രം ആദ്യം ഒരു ശ്രീകൃഷ്ണ ക്ഷേത്രമായിരുന്നു. ഏകദേശം 1,500 വർഷത്തിലധികം പഴക്കം ഈ പ്രതിഷ്ഠയ്ക്കുണ്ടെന്നാണ് വിശ്വസിക്കപ്പെടുന്നത്. പിന്നീട് കാശിയിൽ നിന്നും കടൽ മാർഗ്ഗം ഇവിടെയെത്തിയ അന്നപൂർണ്ണേശ്വരി ദേവി ഈ സ്ഥലത്തിന്റെ പരിശുദ്ധിയിൽ ആകൃഷ്ടയായി ശ്രീകൃഷ്ണന്റെ വടക്കുഭാഗത്തായി കുടികൊണ്ടു എന്നാണ് വിശ്വാസം. ഭക്തരുടെ ദുഃഖങ്ങൾ അകറ്റി, ശാന്തിയും സമാധാനവും ഐശ്വര്യവും ചൊരിയുന്ന കരുണാമയനായ കാർവർണ്ണൻ.